Siriri

Mbï hînga SÎRÎRÎ gï fafadësô, sô lo yeke mbênî bösö ti gbe tî Letäa pëe. Li tî mbï ahuru mîngi tî bâa sô lo kä terê tî lo kwê tî sâra taâ kpëngbä boro kua ndâli tî âwaködörö sô alakata kômblête na pekô tî âbirä na yërë sô ayeke gue lâkwê ôko na nî. Tî pîri nî, âbösö 200 tî ëdëngö-zo laâ akûngbi agä na terê tî Bêafrîka sô ayeke na yâ tî pâsi töngana zo tî kobêla ndâli tî syonî birä tî yângbö tî mbänä nî, sô anînga ngbêreyê na ngû 2012. Gbâ tî âla mîngi agä, abi lê, ahön. SÎRÎRÎ na âfombâ tî lo ayê tî âla daä tî yôro terê ti âla na yâ tî mbênî ngangü kua tî yongôro tângo: müngö päsä tî gue na likôlo na âmôlengê sâki na sâki. Sô zo ahînga atene a kûngbi mîngi tî âdambëtï tî kôzo kere kwê awe, sï na mbâgë, âmôlengê sô kwê sô, ôko na ôko, ayeke âwapâsi tî birä, zo alîngbi gï tî bâa ngangü tî kurä sô SÎRÎRÎ ayê daä tî yôo! Sô a tö ndâ nî kêtê kêtê na 2015 na tângo sô wûsûwusu angbâ kötä na yâ tî ködörö nî, pialö “Mändängö-yê na särängö-ngyâ na Bêafrîka” asö benda, sï agä täpandë tî lönzïngö fängö-mbëtï na likôlo, sô âzo abâa tî âla kôzonî atene lêgë nî ayeke daä pëpe. Atene halë tî âmôlengê ôko ôko ayeke mbênî halëzo ndê. Tî bîanî, âmôlengê sô ayeke manda mbëtï na yâ tî pialö “Mändängö-yê na särängö-ngyâ” tî SÎRÎRÎ sô, ayeke du ânde na mbênî bängö-ndo ndê na ndö tî ködörö tî âla ngâ na ndö tî gîgî tî âla, hâka na tî âbabâ na mamâ tî âla. Zîa ë du na bêkü tî bâa atene, singîla na mabôko sô âfombâ na âzo mîngi ayeke mû, kodë tî fängö-mbëtï tî SÎRÎRÎ sô ayeke vunga ânde taâ bîanî na âdambëtï tî ködörö nî kwê.

Na ngoi sô âködörö ayeke gi bê tî âla tî mängbïngö kodë tî fängö-yê tî âla na gîgî tî fadësô, zîa e bâa yê tî ndimâ sô ayeke sï na Bêafrîka ndâli tî pialökua tî SÎRÎRÎ “Mändängö-yê na sälängö-ngyâ na Bêafrîka.”

Âla tö ndânî mabôko sêngê, na yâ tî mbênî ködörö sô dïköngö-mbëtï na süngö-mbëtï ayeke töngana mbênî kötä mosoro sô sï a lîngbi tî fa nî gï na mbênî yângâ sô ayeke tî âmôlengê nî pëpe, pialö sô agä na finî ngôbo tî mändängö-yê na sälängö-ngyâ. Ayeke mbênî pialö sô abûngbi kambagä tî hïngängö-yê na nzërëngö tî mändängö-yê, sô ayeke sâra kua na âgüpandë sô âyêngi li sï…  azîa ngyâ na bê.

Na tängbïngö marä tî ndarä ndê ndê, lo ngûrûngbi me lo tîa mbênî yê pëpe, pendere kua tî âwakuafûe, na tî âsûndâlimo, mbîrîmbîrî gbüngö-li na… ngyâ tî âmôlengê… yê kwê ayeke daä.

Zîa ë bata täpandë nî bîanî. Ê sû nî, ë dîko nî… na sängö ?

Mbênî pialö sô anzere na ë ngâ tî beke nî !

SÎRÎRÎ ayeke mû mabôko dipîi ahön ngû balë-ôko tî mâi mbênî ködörö sô, mawa nî laâ, ködörösêse tî Tyêki ahînga nî pëpe. Mbênî kpëngbä kua sô kündükua tî ë ayeke sâra laâ pialökua tî “Mändängö-yê na sälängö-ngyâ na Bêafrîka”. Na yâ tî pialökua sô, lo yeke sâra kwê tî vunga âhïngängö-yê, âkodëyê, na ândaräkua, na ngôbo sô alîngbi na kua nî, na âmôlengê sô ködörö tî âla abâa pâsi na yërë na birä, sï kodëlêgë tî fängö-mbëtï tî lo ayke na pöpö tî âbêtaâ syonî ngömbo nî na ndögîgî mobimba. SÎRÎRÎ afa ngâ sô sï, na ïrï  tî pialö nî, ngâ na särängö kua nî, lo yeke tambûla na yâ tî pendâgerê tî Comenius, sô-tî-tene, na âkodëlêgë tî boro fängö-yê torôrô, sô ayeke zî lê tî âmolengê nî kötä na yâ tî mändängö-yê tî âla, sï alîngbi tî gä na âla gî nzönî gbândä ndâli tî mayngö ködörö.